«Yuventus» vingeri Fransishku Konseysau A Seriya doirasidagi «Milan» bilan durang (0:0) qayd etilgan o‘yindan so‘ng intervyu berdi. 23 yoshli futbolchi yakshanba kuni bo‘lib o‘tgan bahsda 80 daqiqa harakat qildi. Portugaliyalik futbolchi raqib darvozasiga zarba berish va aldab o‘tishlar soni bo‘yicha eng yaxshi ko‘rsatkichni qayd etdi, biroq o‘z ismini tabloga yozdirib qo‘ya olmadi.

«Siz hali mening eng yaxshi versiyamni ko‘rganingiz yo‘q. Kelajakda yanada kuchayaman va bundan ham ko‘prog‘iga qodir ekanimni isbotlayman, lekin men ko‘proq gol urishim kerak. Bugun bizda imkoniyatlar bo‘ldi. Menimcha, faqat biz g‘alaba uchun o‘ynadik, "Milan"ni esa durang ham qanoatlantirar edi. Biz yaxshi o‘yin ko‘rsatdik», — deya Konseysauning so‘zlarini keltirmoqda jurnalist Nikolo Skira.

«Yuventus» 64 ochko bilan turnir jadvalida to‘rtinchi o‘rinni egallab turibdi. Ulardan yuqorida «Milan» (67 ochko), pastroqda esa «Komo» va «Roma» (61 ochkodan) joylashgan.