«Ювентус» вингери Франсишку Консейсау А Серия доирасидаги «Милан» билан дуранг (0:0) қайд этилган ўйиндан сўнг интервью берди. 23 ёшли футболчи якшанба куни бўлиб ўтган баҳсда 80 дақиқа ҳаракат қилди. Португалиялик футболчи рақиб дарвозасига зарба бериш ва алдаб ўтишлар сони бўйича энг яхши кўрсаткични қайд этди, бироқ ўз исмини таблога ёздириб қўя олмади.

«Сиз ҳали менинг энг яхши версиямни кўрганингиз йўқ. Келажакда янада кучаяман ва бундан ҳам кўпроғига қодир эканимни исботлайман, лекин мен кўпроқ гол уришим керак. Бугун бизда имкониятлар бўлди. Менимча, фақат биз ғалаба учун ўйнадик, "Милан"ни эса дуранг ҳам қаноатлантирар эди. Биз яхши ўйин кўрсатдик», — дея Консейсаунинг сўзларини келтирмоқда журналист Николо Скира.

«Ювентус» 64 очко билан турнир жадвалида тўртинчи ўринни эгаллаб турибди. Улардан юқорида «Милан» (67 очко), пастроқда эса «Комо» ва «Рома» (61 очкодан) жойлашган.