Italiya A Seriyasi peshqadami «Inter» Madridning «Real» klubi va Ukraina terma jamoasi darvozaboni Andrey Luninni o‘z safiga qo‘shib olmoqchi. Bu haqda Fichajes nashri xabar bermoqda.

Manbaning yozishicha, Milan grandi 27 yoshli posbon uchun 20 million yevro to‘lashga tayyor. «Inter» rahbariyati Luninni jamoaning uzoq muddatli rejalaridagi muhim bo‘g‘in va kelajakdagi asosiy darvozabon sifatida ko‘rmoqda.

Hozirda «qirollik klubi» ushbu taklifni o‘rganib chiqmoqda. Madridliklar uchun zaxira darvozaboni uchun taklif qilinayotgan ushbu summa moliyaviy jihatdan jozibador ko‘rinmoqda. Shunga qaramay, «Real» Luninning maydonga tushgan o‘yinlaridagi ishonchli va barqaror harakatlarini yuqori baholaydi.

Ma’lumot uchun, Andrey Lunin joriy mavsumda barcha musobaqalarda 11 ta uchrashuvda maydonga tushdi. Ushbu bahslarda u o‘z darvozasidan 21 ta to‘p olib chiqdi va bir bor maydondan chetlatildi.