«Barselona» hujumchisi Robert Levandovski joriy mavsum yakunilangach, jamoani tark etadi. Bu haqda BBC jurnalisti Gilyem Balage xabar bermoqda.
37 yoshli polshalik hujumchining kataloniyaliklar bilan amaldagi shartnomasi shu yilning iyun oyi oxirida o‘z nihoyasiga yetadi. Tarqalayotgan xabarlarga ko‘ra, tajribali futbolchi faoliyatini Italiya A Seriyasida davom ettirishi mumkin.
Robert Levandovski «Barselona»dagi to‘rtinchi mavsumini o‘tkazmoqda. Shu vaqt ichida u «ko‘k-anorranglilar» libosida jami 188 ta uchrashuvda maydonga tushib, 118 ta gol urdi va 24 ta golli uzatmaga mualliflik qildi.
Ma’lumot uchun, «Barselona» ayni paytda Ispaniya La Ligasida yaqin ta’qibchisi «Real»ni 11 ochkoga ortda qoldirgan holda peshqadamlik qilmoqda. Katta ehtimol bilan, kataloniyaliklar mavsum yakunida chempionlik unvonini himoya qilishga muvaffaq bo‘lishadi va Levandovski jamoa bilan chempion sifatida xayrlashadi.
