«Барселона» ҳужумчиси Роберт Левандовски жорий мавсум якунилангач, жамоани тарк этади. Бу ҳақда BBC журналисти Гильем Балаге хабар бермоқда.

37 ёшли польшалик ҳужумчининг каталонияликлар билан амалдаги шартномаси шу йилнинг июнь ойи охирида ўз ниҳоясига етади. Тарқалаётган хабарларга кўра, тажрибали футболчи фаолиятини Италия А Сериясида давом эттириши мумкин.

Роберт Левандовски «Барселона»даги тўртинчи мавсумини ўтказмоқда. Шу вақт ичида у «кўк-анорранглилар» либосида жами 188 та учрашувда майдонга тушиб, 118 та гол урди ва 24 та голли узатмага муаллифлик қилди.

Маълумот учун, «Барселона» айни пайтда Испания Ла Лигасида яқин таъқибчиси «Реал»ни 11 очкога ортда қолдирган ҳолда пешқадамлик қилмоқда. Катта эҳтимол билан, каталонияликлар мавсум якунида чемпионлик унвонини ҳимоя қилишга муваффақ бўлишади ва Левандовски жамоа билан чемпион сифатида хайрлашади.