Myunxenning «Bavariya» klubi Germaniya Bundesligasi 31-turi doirasida safarda «Mayns» jamoasi ustidan irodali g‘alabaga erishdi — 4:3.

Uchrashuvning birinchi bo‘limi myunxenliklar uchun muvaffaqiyatsiz kechdi va jamoa tanaffusga 0:3 hisobidagi mag‘lubiyat bilan yo‘l oldi. Biroq ikkinchi bo‘limda Vensan Kompani shogirdlari o‘yin tizginini to‘liq o‘z qo‘llariga olib, to‘rtta gol urishga va g‘alabani ilib ketishga muvaffaq bo‘lishdi.

Bayern & Germany nashrining xabar berishicha, ushbu uchrashuv jamoa uchun tarixiy ahamiyat kasb etdi. «Bavariya» Bundesliga tarixida bir mavsum davomida safar o‘yinlarida 50 ta gol urgan ilk jamoaga aylandi. Hozirda myunxenliklar hisobida mehmonda urilgan 53 ta gol mavjud. Qayd etish joizki, jamoani oldinda hali yana bitta safar bahsi — «Volfsburg»ga qarshi o‘yin kutmoqda.

Eslatib o‘tamiz, Myunxen klubi joriy mavsumda allaqachon muddatidan oldin chempionlikni rasmiylashtirib bo‘lgan.