Мюнхеннинг «Бавария» клуби Германия Бундеслигаси 31-тури доирасида сафарда «Майнц» жамоаси устидан иродали ғалабага эришди — 4:3.

Учрашувнинг биринчи бўлими мюнхенликлар учун муваффақиятсиз кечди ва жамоа танаффусга 0:3 ҳисобидаги мағлубият билан йўл олди. Бироқ иккинчи бўлимда Венсан Компани шогирдлари ўйин тизгинини тўлиқ ўз қўлларига олиб, тўртта гол уришга ва ғалабани илиб кетишга муваффақ бўлишди.

Bayern & Germany нашрининг хабар беришича, ушбу учрашув жамоа учун тарихий аҳамият касб этди. «Бавария» Бундеслига тарихида бир мавсум давомида сафар ўйинларида 50 та гол урган илк жамоага айланди. Ҳозирда мюнхенликлар ҳисобида меҳмонда урилган 53 та гол мавжуд. Қайд этиш жоизки, жамоани олдинда ҳали яна битта сафар баҳси — «Вольфсбург»га қарши ўйин кутмоқда.

Эслатиб ўтамиз, Мюнхен клуби жорий мавсумда аллақачон муддатидан олдин чемпионликни расмийлаштириб бўлган.