Madridning «Real» klubi 2026 yilgi yozgi mavsum uchun o‘z strategiyasini ishlab chiqdi. El Mundo nashrining xabar berishicha, klub rahbariyati yaqinlashib kelayotgan transfer oynasi uchun asosiy maqsad va vazifalarni shakllantirib bo‘lgan.

Klub prezidenti Florentino Peres yangi murabbiy tanlovini o‘z nazoratiga olish niyatida. Qayd etilishicha, funksioner o‘tgan yili Xabi Alonsoni bosh murabbiy etib tayinlashda kechikkanidan afsusda va bu gal bunday xatoga yo‘l qo‘ymoqchi emas.

Transferlar masalasida klub keskin o‘zgarishlardan voz kechishga qaror qilgan. Jamoaning asosiy maqsadi — ijarada yurgan yoki boshqa klublarga sotilgan o‘z tarbiyalanuvchilari va iqtidorli yoshlarini (Niko Pas, Endrik, Viktor Munyos) tarkibga qaytarishdan iborat bo‘ladi.

Shu bilan birga, klub byudjetini muvozanatlashtirish maqsadida ayrim futbolchilarni sotish varianti ham ko‘rib chiqilmoqda. Agar manfaatli takliflar tushsa, Raul Asensio, Eduardo Kamavinga, Dani Sebalyos va Fran Garsiya kabi o‘yinchilarning jamoani tark etishiga ruxsat berilishi mumkin.