Мадриднинг «Реал» клуби 2026 йилги ёзги мавсум учун ўз стратегиясини ишлаб чиқди. El Mundo нашрининг хабар беришича, клуб раҳбарияти яқинлашиб келаётган трансфер ойнаси учун асосий мақсад ва вазифаларни шакллантириб бўлган.
Клуб президенти Флорентино Перес янги мураббий танловини ўз назоратига олиш ниятида. Қайд этилишича, функционер ўтган йили Хаби Алонсони бош мураббий этиб тайинлашда кечикканидан афсусда ва бу гал бундай хатога йўл қўймоқчи эмас.
Трансферлар масаласида клуб кескин ўзгаришлардан воз кечишга қарор қилган. Жамоанинг асосий мақсади — ижарада юрган ёки бошқа клубларга сотилган ўз тарбияланувчилари ва иқтидорли ёшларини (Нико Пас, Эндрик, Виктор Муньос) таркибга қайтаришдан иборат бўлади.
Шу билан бирга, клуб бюджетини мувозанатлаштириш мақсадида айрим футболчиларни сотиш варианти ҳам кўриб чиқилмоқда. Агар манфаатли таклифлар тушса, Рауль Асенсио, Эдуардо Камавинга, Дани Себальос ва Фран Гарсия каби ўйинчиларнинг жамоани тарк этишига рухсат берилиши мумкин.
