Kataloniyaning «Barselona» klubi yozgi transfer oynasida Dortmundning «Borussiya» jamoasi yarim himoyachisi Yulian Brandtni o‘z safiga qo‘shib olmoqchi. Bu haqda Fussballdaten nashri xabar bermoqda.
29 yoshli futbolchi joriy mavsum yakunida Germaniya klubini erkin agent sifatida tark etadi. «Barselona» rahbariyati Brandtni tarkibni kuchaytirish uchun eng maqbul — «oltin variant» sifatida ko‘rmoqda. Biroq kataloniyaliklar bu yo‘lda jiddiy raqobatga duch kelishlari mumkin. Nemis futbolchisiga, shuningdek, «Aston Villa», «Nyukasl» va Madridning «Atletiko» klublari ham qiziqish bildirmoqda.
Ma’lumot uchun, Yulian Brandt joriy mavsumda «Borussiya» safida barcha turnirlarda 37 ta uchrashuvda maydonga tushib, o‘z hisobiga 11 ta gol va 3 ta golli uzatmani yozdirib qo‘ydi. Avvalroq Dortmund klubi sport direktori Lars Rikken futbolchi bilan amaldagi shartnoma uzaytirilmasligini rasman tasdiqlagan edi.
