Каталониянинг «Барселона» клуби ёзги трансфер ойнасида Дортмунднинг «Боруссия» жамоаси ярим ҳимоячиси Юлиан Брандтни ўз сафига қўшиб олмоқчи. Бу ҳақда Fussballdaten нашри хабар бермоқда.

29 ёшли футболчи жорий мавсум якунида Германия клубини эркин агент сифатида тарк этади. «Барселона» раҳбарияти Брандтни таркибни кучайтириш учун энг мақбул — «олтин вариант» сифатида кўрмоқда. Бироқ каталонияликлар бу йўлда жиддий рақобатга дуч келишлари мумкин. Немис футболчисига, шунингдек, «Астон Вилла», «Ньюкасл» ва Мадриднинг «Атлетико» клублари ҳам қизиқиш билдирмоқда.

Маълумот учун, Юлиан Брандт жорий мавсумда «Боруссия» сафида барча турнирларда 37 та учрашувда майдонга тушиб, ўз ҳисобига 11 та гол ва 3 та голли узатмани ёздириб қўйди. Аввалроқ Дортмунд клуби спорт директори Ларс Риккен футболчи билан амалдаги шартнома узайтирилмаслигини расман тасдиқлаган эди.