Dunyoning eng kuchli shaxmatchilaridan biri Fabiano Karuana shaxmat rivojida davlatning o‘rni haqida to‘xtalar ekan, bu boradagi eng yorqin misol sifatida O‘zbekistonni alohida e’tirof etdi.

Karuananing ta’kidlashicha, hukumat darajasidagi yuksak e’tibor tufayli O‘zbekiston bugun dunyo shaxmatining yetakchi mamlakatlaridan biriga aylangan.

“Agar so‘nggi yigirma yillikda shaxmatda eng katta o‘sishga erishgan mamlakatlarni sanasak, bular — O‘zbekiston va Hindistondir. Bu davlatlarda hukumat shaxmatni rivojlantirish uchun ulkan mablag‘ va kuch sarfladi, natijalar esa ko‘z o‘ngimizda. O‘zbekiston unchalik katta bo‘lmagan davlat bo‘lishiga qaramay, dunyoning eng kuchli shaxmatchilarini yetishtirib chiqarmoqda”, — deydi grossmeyster.

Shuningdek, shaxmatchi elit sportchilarning vazifasi nafaqat g‘alaba qozonish, balki yosh avlodni shaxmatga qiziqtirish ekanini, O‘zbekiston kabi davlatlarda bu tizim namunali yo‘lga qo‘yilganini qayd etdi.

Ma’lumot uchun, o‘zbekistonlik shaxmatchilar orasida ilk bor Nomzodlar turnirida qatnashgan Javohir Sindorov 10 ochko bilan g‘oliblikni qo‘lga kiritdi va musobaqani mag‘lubiyasiz yakunladi. U turnir davomida ikkita rekordni yangiladi: eng ko‘p jamg‘arilgan ochko va eng ko‘p g‘alaba. Sindorov da’vogarlar musobaqasida Andrey Yesipenko, Rameshbabu Pragnanandha (ikki marta), Fabiano Karuana, Hikaru Nakamura va Vey Yi kabi kuchli grossmeysterlar ustidan g‘alaba qozondi.

Javohir Sindorov mazkur turnir g‘olibi sifatida amaldagi Jahon chempioni Gukesh Dommarajuga qarshi shaxmat toji uchun kechadigan bahsda ishtirok etish huquqini qo‘lga kiritdi. Turnir sanasi va manzili FIDE tomonidan e’lon qilinadi.

Shuningdek, Sindorov 2025-yilgi Jahon Kubogida barcha raqiblarini mag‘lub etib, chempion bo‘lgan edi. Nodirbek Abdusattorov esa 2025-yilda London Chess Classic, 2026-yilda esa Tata Steel Chess musobaqalarida zafar quchdi. Nodirbek Yoqubboyev 2023-yilda Qatar Masters turniri g‘olibi bo‘lgan.