Madridning «Real» klubi himoyachisi Eder Militao yana jarohat oldi. Braziliyalik futbolchining mushaklaridagi muammo jiddiy bo‘lib chiqdi va u endi yaqin orada maydonga qayta olmaydi.

The Touchline nashrining jurnalist Abraham Romeroga tayanib xabar berishicha, Militao shu haftada Finlyandiyada soha mutaxassisi tomonidan jarrohlik amaliyotini o‘tkazadi. Operasiyadan so‘ng futbolchining tiklanishi uchun taxminan besh oy vaqt talab etiladi. Bu esa himoyachining faqat kuzga kelibgina safga qaytishini anglatadi.

Madridliklar himoya chizig‘idagi bu yo‘qotish bilan navbatdagi uchrashuvni 3 may, yakshanba kuni safarda «Espanyol»ga qarshi o‘tkazadi. Eslatib o‘tamiz, ayni damda «Real» La Liga turnir jadvalida peshqadam «Barselona»dan 11 ochko ortda qolgan holda ikkinchi o‘rinni egallab turibdi.