Мадриднинг «Реал» клуби ҳимоячиси Эдер Милитао яна жароҳат олди. Бразилиялик футболчининг мушакларидаги муаммо жиддий бўлиб чиқди ва у энди яқин орада майдонга қайта олмайди.
The Touchline нашрининг журналист Абраҳам Ромерога таяниб хабар беришича, Милитао шу ҳафтада Финляндияда соҳа мутахассиси томонидан жарроҳлик амалиётини ўтказади. Операциядан сўнг футболчининг тикланиши учун тахминан беш ой вақт талаб этилади. Бу эса ҳимоячининг фақат кузга келибгина сафга қайтишини англатади.
Мадридликлар ҳимоя чизиғидаги бу йўқотиш билан навбатдаги учрашувни 3 май, якшанба куни сафарда «Эспаньол»га қарши ўтказади. Эслатиб ўтамиз, айни дамда «Реал» Ла Лига турнир жадвалида пешқадам «Барселона»дан 11 очко ортда қолган ҳолда иккинчи ўринни эгаллаб турибди.
