Myunxenning «Bavariya» klubi kuzatuv kengashi a’zosi Karl-Xayns Rummenigge «PSJ» prezidenti Nosir Al-Xelayfining faoliyati haqida iliq fikrlarni bildirib o‘tdi. Qatarlik biznesmen 2011 yildan buyon Parij klubini boshqarib kelmoqda va 2025 yilda jamoa o‘z tarixida ilk bor Chempionlar ligasi g‘olibiga aylandi.
«Men Nosir uchun va muxlislar uni shunday yaxshi qabul qilishayotganidan xursandman. Aslida muxlislar ham undan ko‘p qarzdor. Qatar Sports Investments klubni sotib olguniga qadar «Pari Sen-Jermen» nima edi?
2020 yilgi finaldagi mag‘lubiyatdan so‘ng Nosirning qanchalik tushkunlikka tushgani yodimda. O‘shanda men unga sabrli bo‘lish kerakligini, futbolda hech narsa osonlik bilan qo‘lga kiritilmasligini aytgandim. Muvaffaqiyat uchun qattiq mehnat va aqlli transferlar zarur. «PSJ»ning yana yarim finalga chiqishi tasodif emas, ular fantastik futbol o‘ynashmoqda», — deya Rummeniggening so‘zlarini keltiradi RMC Sports.
Eslatib o‘tamiz, bugun, 28 aprel kuni Chempionlar ligasi yarim finali doirasida «PSJ» o‘z maydonida «Bavariya»ni qabul qiladi. O‘yin Toshkent vaqti bilan soat 00:00 da boshlanadi.
