«Barselona» yulduzlari Lamin Yamal, Robert Levandovski va Voychex Shesni polshalik blogerga saraton bilan kasallangan bolalar uchun rekord darajadagi mablag‘ yig‘ishda yordam berishdi.
Latwogang laqabi bilan tanilgan 23 yoshli yutuber Petr Xanke Varshavadagi xonadonidan turib «Cancer Fighters Foundation» (CFF) fondi uchun to‘qqiz kunlik uzluksiz jonli efir namoyish etdi. Ushbu ulkan xayriya marafonida «Barsa» futbolchilari bilan birga «Coldplay» guruhi vokalisti Kris Martin ham ishtirok etdi.
Xususan, Lamin Yamal darvozabon Shesnining videosida paydo bo‘lib, yig‘imni qo‘llab-quvvatlagan bo‘lsa, Robert Levandovski o‘zining TikTok sahifasida maxsus qo‘shiqqa raqsga tushib, aksiyaga e’tibor qaratdi. Ma’lumotlarga ko‘ra, efirni bir vaqtning o‘zida 1,4 million kishi tomosha qilgan.
Yig‘ilgan 59 million yevrodan ortiq mablag‘ dunyo rekordini yangiladi. Bungacha bo‘lgan eng yirik ko‘rsatkich o‘tgan yili fransiyalik strimerlar tomonidan qayd etilgan bo‘lib, ular 16,1 million yevro to‘plashgan edi.
