«Барселона» юлдузлари Ламин Ямаль, Роберт Левандовски ва Войчех Шесни польшалик блогерга саратон билан касалланган болалар учун рекорд даражадаги маблағ йиғишда ёрдам беришди.
Latwogang лақаби билан танилган 23 ёшли ютубер Петр Ханке Варшавадаги хонадонидан туриб «Cancer Fighters Foundation» (CFF) фонди учун тўққиз кунлик узлуксиз жонли эфир намойиш этди. Ушбу улкан хайрия марафонида «Барса» футболчилари билан бирга «Coldplay» гуруҳи вокалисти Крис Мартин ҳам иштирок этди.
Хусусан, Ламин Ямал дарвозабон Шеснининг видеосида пайдо бўлиб, йиғимни қўллаб-қувватлаган бўлса, Роберт Левандовски ўзининг TikTok саҳифасида махсус қўшиққа рақсга тушиб, акцияга эътибор қаратди. Маълумотларга кўра, эфирни бир вақтнинг ўзида 1,4 миллион киши томоша қилган.
Йиғилган 59 миллион евродан ортиқ маблағ дунё рекордини янгилади. Бунгача бўлган энг йирик кўрсаткич ўтган йили франциялик стримерлар томонидан қайд этилган бўлиб, улар 16,1 миллион евро тўплашган эди.
