Argentinaning «San-Lorenso» klubining Neymar ismli yosh muxlisi Janubiy Amerika kubogi doirasidagi o‘yin oldidan «Santos» hujumchisi Neymar bilan uchrashish baxtiga muyassar bo‘ldi. Bu haqda OneFootball nashri xabar bermoqda.
Uchrashuv Braziliya jamoasi to‘xtagan «Interkontinental» mehmonxonasida bo‘lib o‘tdi. Ma’lum bo‘lishicha, bolakay braziliyalik yulduzning ashaddiy ishqibozi hisoblanadi. Uning ota-onasi farzandining ismini mashhur futbolchi sharafiga o‘zgartirishga ikkilanib o‘tirishmagan. Samimiy ruhda kechgan uchrashuv yakunida Neymar o‘z ismidoshining libosiga dastxat qoldirdi.
Eslatib o‘tamiz, «San-Lorenso» va «Santos» o‘rtasidagi bahs 29 aprel kuni Buenos-Ayresdagi «Pedro Bidegen» stadionida bo‘lib o‘tadi. Ayni damda argentinaliklar guruhda peshqadamlik qilishmoqda, «Santos» esa so‘nggi o‘rinda bormoqda.
