Neapolliklar «Sporting»dan ijaraga olingan iqtidorli vinger Alisson Santosning transfer huquqini to‘liq sotib olishga qaror qildi. Bu haqda Nikolo Skira xabar berdi.
Ma’lumotlarga ko‘ra, «Napoli» Portugaliya klubiga futbolchining to‘liq transferi uchun qo‘shimcha 16,5 million yevro to‘lab beradi. Futbolchining o‘zi Neapolda qolishni istayotgani sababli, shaxsiy shartnoma borasida ham to‘liq kelishuvga erishilgan.
Unga ko‘ra, 23 yoshli braziliyalik futbolchi jamoa bilan 2030 yilgacha mo‘ljallangan uzoq muddatli shartnoma imzolaydi. Kelishuvda shartnomani yana bir yilga — 2031 yilgacha uzaytirish bandi ham mavjud bo‘ladi.
