Madridning «Atletiko» klubi bosh murabbiyi Diyego Simeone jamoa hujumchisi Xulian Alvaresning ehtimoliy ketishi borasidagi xabarlarga izoh berdi. Avvalroq, argentinalik futbolchi faoliyatini «Barselona»da davom ettirishni istayotgani haqida ma’lumotlar tarqalgan edi.

«Uning xayolida nima borligini bilmayman. Unga «Arsenal», «PSJ» va «Barsa» kabi klublar qiziqish bildirayotgani — bu tabiiy hol», — dedi Simeone jurnalistlarga.

Joriy mavsumda 26 yoshli Alvares barcha turnirlarni hisobga olgan holda 47 ta o‘yinda ishtirok etdi. Ushbu bahslarda u 19 ta gol urdi va 9 ta golli uzatmaga mualliflik qildi. Nufuzli Transfermarkt portali ma’lumotlariga ko‘ra, Alvaresning bozor qiymati 90 million yevroni tashkil etadi.