Мадриднинг «Атлетико» клуби бош мураббийи Диего Симеоне жамоа ҳужумчиси Хулиан Альвареснинг эҳтимолий кетиши борасидаги хабарларга изоҳ берди. Аввалроқ, аргентиналик футболчи фаолиятини «Барселона»да давом эттиришни истаётгани ҳақида маълумотлар тарқалган эди.

«Унинг хаёлида нима борлигини билмайман. Унга «Арсенал», «ПСЖ» ва «Барса» каби клублар қизиқиш билдираётгани — бу табиий ҳол», — деди Симеоне журналистларга.

Жорий мавсумда 26 ёшли Альварес барча турнирларни ҳисобга олган ҳолда 47 та ўйинда иштирок этди. Ушбу баҳсларда у 19 та гол урди ва 9 та голли узатмага муаллифлик қилди. Нуфузли Transfermarkt портали маълумотларига кўра, Альвареснинг бозор қиймати 90 миллион еврони ташкил этади.