O‘zbekiston Superligasining 10-turi doirasida Jizzaxning «So‘g‘diyona» jamoasi Zomindagi stadionda Termizning «Surxon» klubini qabul qildi. Keskin va hujumkor ruhda o‘tgan bahsda jizzaxliklar yirik — 5:2 hisobidagi g‘alabani qo‘lga kiritishdi.

Ulug‘bek Baqoyev shogirdlari uchrashuvni juda faol boshlashdi. 11-daqiqadayoq Lyupcho Doriyev hisobni ochgan bo‘lsa, oradan ko‘p o‘tmay Islom Qobilov oradagi farqni ikkitaga oshirdi. Ikkinchi bo‘limda ham «bo‘rilar» hujumkorlikni pasaytirishmadi va Zoir Jo‘raboyev hamda Feysal Mulichning gollaridan so‘ng hisob 4:0 ko‘rinishiga keldi.

O‘yin yakunida termizliklar Xumoyun Sherbo‘tayev va Stefen Chineduning sa’y-harakatlari bilan farqni qisqartirishga muvaffaq bo‘lishdi. Biroq zaxiradan maydonga tushgan Aleksandr Bolevich 89-daqiqada jamoasining beshinchi golini urib, bahsga yakuniy nuqtani qo‘ydi.

Ushbu muhim g‘alabadan so‘ng «So‘g‘diyona» ochkolari sonini 9 taga yetkazib, turnir jadvalida 13-o‘ringa ko‘tarilib oldi. «Surxon» esa 11 ochko bilan 12-pog‘onada qoldi.

Superliga. 10-tur
«So‘g‘diyona» – «Surxon» 5:2

Gollar: Lyupcho Doriyev (11), Islom Qobilov (15), Zoir Jo‘raboyev (53), Feysal Mulich (61), Aleksandr Bolevich (89) — Xumoyun Sherbo‘tayev (73), Stefen Chinedu (76).

«So‘g‘diyona»: N.Mirkovich, Z.Jo‘raboyev, I.Qobilov, O.Ahadov, F.Mulich, J.Qahramonov, O.Jo‘raqo‘ziyev, L.Doriyev, O.Karimov, A.Abdurashidov, N.Soyibov.

«Surxon»: O.Boymurodov, B.Jumatav, N.Ne’matxonov, B.SHamsiyev, D.Tursunov, X.SHerbo‘tayev, S.CHinedu, R.Fraydey, S.Abduhamidov, J.Jo‘rayev, B.SHaydulov.