Superliganing 10-turi doirasida kechgan «So‘g‘diyona» – «Surxon» (5:2) uchrashuvidan so‘ng mehmonlar murabbiyi Anvar G‘ofurov ishtirokida matbuot anjumani bo‘lib o‘tdi. Mutaxassis yirik mag‘lubiyat sabablari va jamoadagi holat haqida to‘xtalib o‘tdi.

Mag‘lubiyat va tayyorgarlik haqida

Anvar G‘ofurov raqibni g‘alaba bilan tabriklar ekan, o‘z shogirdlarining jismoniy va ruhiy holatiga shubha bildirdi.

«Ayrim futbolchilar bahsga 100 foiz tayyor emasdek tuyuldi va bu o‘yinda ham yaqqol sezildi. Shunday bo‘lsa-da, mukammal darajaga chiqish uchun jamoa sifatida hali ko‘p ishlashimiz kerakligi ko‘rinib qoldi. Bugun futbolchilar o‘yinga to‘liq kirishib keta olishmadi. Lekin bu futbol — har doim ham g‘alaba qozonib bo‘lmaydi, pasayish va yuksalishlar tabiiy holat», — deydi G‘ofurov.

Tig‘iz taqvim va rotasiya

Murabbiy o‘yinlarning zichligi tarkibdagi o‘zgarishlarga imkon berayotganini, biroq bundan hamma ham unumli foydalana olmayotganini ta’kidladi.

«Hozircha vaqt biroz tig‘iz, taqvim zich. Biroq buning ijobiy jihati ham bor — o‘yinlar ko‘pligi sababli rotasiya qilyapmiz va deyarli barcha futbolchilarga imkoniyat berilmoqda. Ammo bu imkoniyatdan kim qanday foydalanayotgani — bu alohida masala».

Mas’uliyat va kelajakdagi rejalar

Shuningdek, mutaxassis mag‘lubiyat uchun javobgarlikdan qochmasligini va jamoada ijobiy o‘zgarishlar bo‘lishiga ishonishini bildirdi.

«Shaxsan o‘zim ham mas’uliyatni his qilaman — balki ayrim xatolarga yo‘l qo‘ygandirman. Eng muhimi, biz bir jamoa bo‘lib ishlashda davom etishimiz kerak. Ishonamanki, vaqt o‘tishi bilan jamoamiz yanada yaxshilanadi va ijobiy o‘zgarishlar bo‘ladi», — deya xulosa qildi murabbiy.

Eslatib o‘tamiz, «Surxon» ushbu mag‘lubiyatdan so‘ng 11 ochko bilan turnir jadvalida 12-o‘rinda qolmoqda. Termizliklar navbatdagi turda o‘z uylarida muxlislarini xursand qilishga harakat qilishadi.