«Arsenal» va «Barselona»ning sobiq hujumchisi Tyerri Anri Chempionlar ligasi yarim finali birinchi uchrashuvida «PSJ»ning «Bavariya» ustidan qozongan 5:4 hisobidagi g‘alabasi haqida fikr bildirdi.

«Yaqinda biz tavakkal qilmaydigan jamoalar, aldashga kirmaydigan futbolchilar, g‘alaba uchun emas, mag‘lub bo‘lmaslik uchun o‘ynaydigan jamoalar haqida gaplashgandik.

Bugun esa juda ko‘p tavakkal bo‘ldi. Agar siz himoyaviy uslub tarafdori bo‘lsangiz, ha, bunday o‘yindan aqldan ozishingiz mumkin... Ammo menga farqi yo‘q!

Biz bir-ikki yildan beri futbol zerikarli bo‘lib qolganidan shikoyat qilib kelyapmiz, lekin bu uchrashuv bunday emasdi!

Professional jihatni chetga surib qo‘ysak — albatta, tahlil qilishimiz kerak bo‘lgan holatlar bor — menga o‘yin juda yoqdi va uyida tomosha qilgan har bir muxlis uchun ham qiziq bo‘lgan, deb o‘ylayman», — dedi Anri CBS efirida.

«PSJ» va «Bavariya» o‘rtasidagi yarim final javob uchrashuvi bir haftadan so‘ng — 6 may kuni Myunxenda bo‘lib o‘tadi.

Ushbu juftlik g‘olibi finalda «Atletiko» — «Arsenal» qarama-qarshiligi g‘olibi bilan o‘ynaydi.