«Santos» hujumchisi Neymar hali ham bo‘lajak jahon chempionatiga Braziliya terma jamoasi tarkibida borishiga ishonmoqda. 34 yoshli futbolchining imkoniyatlari past baholanayotgan bo‘lsa-da, yulduzli forvardning o‘zi umidini uzgani yo‘q.
«Har bir inson jahon chempionatida o‘ynashni orzu qiladi. Xudo xohlasa, men u yerda bo‘laman», — deya Neymarning mundial haqidagi savolga bergan javobini iqtibos keltiradi The Touchline. «Santos» hujum yetakchisi, shuningdek, finalda Braziliya va Argentina to‘qnash kelishidan xursand bo‘lishini qo‘shimcha qildi.
Neymar «pentakampeonlar» safida 128 ta o‘yin o‘tkazib, 79 ta gol urishga muvaffaq bo‘lgan. Futbolchining milliy terma jamoa libosida maydondagi oxirgi ko‘rinishi 2023 yilning oktyabr oyiga to‘g‘ri keladi.
