«Сантос» ҳужумчиси Неймар ҳали ҳам бўлажак жаҳон чемпионатига Бразилия терма жамоаси таркибида боришига ишонмоқда. 34 ёшли футболчининг имкониятлари паст баҳоланаётган бўлса-да, юлдузли форварднинг ўзи умидини узгани йўқ.
«Ҳар бир инсон жаҳон чемпионатида ўйнашни орзу қилади. Худо хоҳласа, мен у ерда бўламан», — дея Неймарнинг мундиал ҳақидаги саволга берган жавобини иқтибос келтиради The Touchline. «Сантос» ҳужум етакчиси, шунингдек, финалда Бразилия ва Аргентина тўқнаш келишидан хурсанд бўлишини қўшимча қилди.
Неймар «пентакампеонлар» сафида 128 та ўйин ўтказиб, 79 та гол уришга муваффақ бўлган. Футболчининг миллий терма жамоа либосида майдондаги охирги кўриниши 2023 йилнинг октябрь ойига тўғри келади.
