Argentinalik hujumchi Paulo Dibala qachondir «Boka Xuniors» libosini kiyish istagi borligi haqida gapirib o‘tdi. U avval hech qachon ushbu klubda to‘p surmagan va faoliyatining katta qismini A Seriyada o‘tkazgan. Biroq hozirda uni vataniga nafaqat nostalgiya, balki turmush o‘rtog‘i Oryana Sabatini hamda yaqin do‘sti Leandro Paredes ham chorlamoqda.
«Kimdir menga «Boka Xuniors» formasidagi suratimni yuboribdi. Bu sun’iy intellekt mahsulimi yoki boshqa narsa — tushuna olmayapman. Aslida ham ularning libosini kiyishni xohlarmidim? Bu yomon bo‘lmasdi, lekin hozirda men «Roma» sharafini himoya qilyapman va shu klub ranglari uchun kurashishim kerak. Kelajakda esa... Kim biladi deysiz?», — deya Dibalaning so‘zlaridan iqtibos keltiradi derbyderbyderby.it nashri.
Eslatib o‘tamiz, Paulo Dibala ayni damda Rimning «Roma» klubi a’zosi hisoblanadi.
