«Manchester Siti» hujumchisi Erling Xoland Chempionlar ligasi yarim finali doirasidagi «PSJ» va «Bavariya» o‘rtasidagi uchrashuvni tomosha qilish jarayonidagi taassurotlari bilan o‘rtoqlashdi.
Jamoalar bir-birlariga to‘qqizta gol urib (5:4), turnirning yarim final bosqichida sermahsullik bo‘yicha rekord o‘rnatishdi. Uchrashuv davom etayotgan bir paytda norvegiyalik forvard qisqacha izoh qoldirdi.
«Bu futbol», – deb yozdi Xoland ijtimoiy tarmoqlardagi sahifasida o‘yindan olingan suratni ilova qilgan holda.
Javob o‘yini 6 may kuni Myunxenda bo‘lib o‘tadi. Finalning ikkinchi yo‘llanmasi uchun Londonning «Arsenal» va Madridning «Atletiko» jamoalari bahs olib borishadi.
Erling Xoland «Manchester Siti» tarkibida turnirdagi ishtirokini 1/8 final bosqichidayoq yakunlagan edi – «shaharliklar» Madridning «Real» klubiga imkoniyatni boy berishgan.
