Myunxenning «Bavariya» klubi bosh murabbiyi Vensan Kompani Chempionlar ligasi dastlabki yarim finali doirasidagi «PSJ»ga qarshi o‘yindan (4:5) so‘ng, darhol kiyinish xonasiga yo‘l oldi. Nemis klubining ijtimoiy tarmoqlaridagi ma’lumotlarga ko‘ra, Kompani futbolchilarga ko‘rsatilgan o‘yin uchun minnatdorchilik bildirgan. Qayd etilishicha, Kompani «Bavariya»ning turnir finaliga chiqish imkoniyatiga katta optimizm bilan qaramoqda.
«U biz bilan faxrlanishini aytdi — hisobni qisqartirganimiz, maydondagi shiddatimiz va ko‘rsatgan sifatli o‘yinimiz unga manzur bo‘lgan. Shuningdek, u Myunxendagi bahsni intiqlik bilan kutayotganini ta’kidladi», — dedi «Bavariya» matbuot xizmatiga yarim himoyachi Aleksandr Pavlovich.
«PSJ»ga qarshi bahs davomida myunxenliklar 2:5 hisobida mag‘lub bo‘layotgan edilar. «Bavariya» tarkibida gollarni Keyn, Olise, Upamekano va Dias kiritishdi.
