Myunxenning «Bavariya» klubi sport direktori lavozimida faoliyat yuritayotgan Maks Eberl Chempionlar ligasi yarim finali doirasidagi «PSJ»ga qarshi o‘yin (4:5) natijasiga munosabat bildirdi.
Funksionerning so‘zlariga ko‘ra, hisob 5:2 ko‘rinishini olganda, parijliklar xuddi finalga chiqib bo‘lgandek g‘alabani nishonlay boshlashgan.
«Bunday vaziyatda va shunday muxlislarga qarshi o‘yinda ikkita to‘p farqini yo‘qqa chiqarish — bu alohida hodisa. Bu jamoaning xarakterini belgilab beradi va javob o‘yinida bizga aynan shu xislat kerak bo‘ladi», — deya Eberlning so‘zlarini keltiradi Bayern & Germany.
Eslatib o‘tamiz, yarim finalning javob uchrashuvi 6 may kuni Germaniyada bo‘lib o‘tadi. O‘yin Toshkent vaqti bilan tungi soat 00:00 da boshlanadi.
