Londonning «Arsenal» klubi hujumchisi Viktor Dyokeresh Chempionlar ligasi yarim finali doirasidagi «Atletiko»ga qarshi dastlabki bahsda (1:1) yana bir bor o‘zining sovuqqonligini namoyish etdi. Shved futbolchisi 44-daqiqada 11 metrlik jarima zarbasini bexato amalga oshirib, hisobni ochdi.
Opta statistika portalining qayd etishicha, Dyokeresh klub va terma jamoa miqyosida ijro etgan so‘nggi 27 ta penaltining barchasini golga aylantirgan. Uning ushbu hayratlanarli seriyasi bundan ikki yil avval — 2024 yilning mart oyida, futbolchi hali Lissabonning «Sporting» klubi sharafini himoya qilayotgan kezlarda boshlangan edi.
Shu tariqa, 27 yoshli forvard ikki yildan beri 11 metrlik nuqtada xato nimaligini bilmay kelmoqda. Biroq uning goli «kanonirlar»ga Madridda g‘alaba qozonish uchun kifoya qilmadi. 56-daqiqada «matraschilar» hujumchisi Xulian Alvares ham penaltidan unumli foydalanib, muvozanatni tikladi.
