Skott Parker tomonlarning o‘zaro kelishuviga ko‘ra «Bernli» bosh murabbiyi lavozimini tark etdi, deya xabar berdi klub matbuot xizmati.

«O‘tgan haftada klubning Premyer-ligadan tushib ketishi tasdiqlangach, Parker va direktorlar kengashi muzokaralar o‘tkazishdi va uning «Terf Mur»dagi faoliyatini yakunlash bo‘yicha o‘zaro kelishuvga erishildi.

Parker o‘z faoliyati davomida «Bernli»ni 2024/25 yilgi rekord darajadagi mavsum sari boshlab bordi va jamoaning Chempionshipdan Premyer-ligaga chiqishini ta’minladi. O‘sha mavsumda jamoa 33 ta o‘yinda mag‘lubiyatsiz seriya qayd etgan va 30 bor o‘z darvozasi daxlsizligini saqlab qolgan edi.

Klub Skottga professionalligi, fidoyiligi va qo‘shgan hissasi uchun samimiy minnatdorchilik bildiradi. U «Bernli» bilan bog‘liq bo‘lgan barchaning hurmati va tashakkuri bilan ketmoqda.

Mayk Jekson mavjud murabbiylar shtabi ko‘magida, Premyer-liganing qolgan to‘rtta o‘yinida, jumladan, juma kuni «Lids Yunayted»ga qarshi safardagi bahsda vaqtinchalik jamoani boshqarib turadi. 2026/27 yilgi mavsum oldidan yangi doimiy bosh murabbiyni tayinlash jarayoni boshlandi», — deyiladi «Bernli» bayonotida.

«Chelsi» va «Tottenxem» klublarining sobiq yarim himoyachisi Parker «Bernli»ni 2024 yildan beri boshqarib kelayotgan edi. Hozirda jamoa Premyer-ligada 34 o‘yindan keyin 20 ochko to‘plagan holda 19-o‘rinni egallab turibdi.