1–7 may kunlari Shvesiyaning Malmyo shahrida an’anaviy TePe Sigeman Chess Tournament 2026 musobaqasi bo‘lib o‘tadi. Bu yil turnir 31-marotaba tashkil etilmoqda.
Musobaqada jahon shaxmatining yetakchi grossmeysterlari ishtirok etadi. Ular orasida Magnus Karlsen, Nodirbek Abdusattorov, Arjun Erigaisi, Yorden van Forest, Nils Grandelius, Yagiz Kaan Erdogmush, Endi Vudvard va Ju Juner bor.
Turnir aylanma (round-robin) tizimida o‘tkaziladi. 8 nafar ishtirokchi 7 tur davomida bir-biriga qarshi bahs olib boradi. Vaqt nazoratiga ko‘ra, shaxmatchilar har partiya uchun 40 yurishga 90 daqiqa, so‘ngra partiya oxirigacha 30 daqiqa oladi. Shuningdek, har yurish uchun 30 soniya qo‘shimcha beriladi.
Qayd etish joiz, so‘nggi ikki yilda ushbu turnirda o‘zbekistonlik shaxmatchilar g‘alaba qozongan. 2024 yilda Nodirbek Abdusattorov chempion bo‘lgan bo‘lsa, 2025 yilda Javohir Sindarov bosh sovrinni qo‘lga kiritgan.
Bu yilgi musobaqada ham yurtdoshlarimizdan yuqori natija kutiladi.













