Yulduz hujumchi Lionel Messi yaqinda Ispaniyaning beshinchi divizionida ishtirok etuvchi «Kornelya» klubi egasiga aylandi. «Inter Mayami» futbolchisi «Kornelya» o‘yinchilari uchun maxsus videomurojaat yo‘lladi.
«Salom. Men shunchaki o‘zimni tanishtirish va barchangiz bilan salomlashish uchun ushbu videoni yozdim. Shuni bilingki, biz bu yerga rivojlanish va sizni barcha kerakli narsalar bilan qo‘llab-quvvatlash uchun kelganmiz. Ushbu yangi loyihadan juda mamnunmiz», — deya Messining so‘zlaridan iqtibos keltirmoqda The Touchline nashri.
Lionel Messi sakkiz karra «Oltin to‘p» sohibi hisoblanadi. Argentinalik yulduzning «Inter Mayami» bilan amaldagi shartnomasi 2028 yilning o‘rtalariga qadar mo‘ljallangan.
