«Liverpul» bosh murabbiyi Arne Slot «Manchester Yunayted»ning joriy mavsumdagi o‘yinlarini yuqori baholadi.

3 may kuni jamoalar APL doirasida «Old Trafford» stadionida o‘zaro to‘qnash keladilar.

«O‘tgan mavsumda mankunianliklarga qarshi o‘ynaganimizda, ular turnir jadvalida hozirgidek yuqori o‘rinda emas edilar. Ammo o‘shanda ham men ularning futbolchilari egallab turgan o‘rinlaridan ko‘ra ancha kuchliroq ekanini aytgandim.

Ular transfer oynasida bir nechta xaridlarni amalga oshirishdi va bu nihoyat ularning o‘yinchilari qanchalik mahoratli ekanini ko‘rish imkonini berdi.

Biz ularning haqiqatan ham kuchli ekanini doim bilardik, endi esa bu turnir jadvalida ham aks etmoqda. Ehtimol, ularning haftada faqat bir marta o‘yin o‘tkazayotganliklari kichik ustunlik berayotgandir.

Ayniqsa, Maykl Kerrik boshchiligida ular natijalar borasida barqarorlikka erishdilar», — dedi Arne Slot.