Manbalarning xabar berishicha, «Vest Xem» himoyachisi El-Xadji Malik Diuf «Manchester Yunayted»ning potensial transfer nishoniga aylandi.
Senegallik futbolchi «Yunayted»da katta qiziqish uyg‘otgan. «Qizil iblislar» mudofaaning chap qanotida raqobatni kuchaytirishga intilishmoqda. Diuf o‘tgan yozda 19 million funt sterling evaziga «Vest Xem»ga o‘tgan edi. U qisqa vaqt ichida «bolg‘achilar»ning APLda jon saqlab qolish uchun olib borayotgan kurashida asosiy figuralardan biriga aylandi.
Malik Diuf «Yunayted» uchun variantlardan biri bo‘lsa-da, klub uchun asosiy ustuvor vazifa (prioritet) hamon yarim himoyani kuchaytirish bo‘lib qolmoqda. Qanot himoyachisini sotib olish faqat qo‘shimcha mablag‘lar mavjud bo‘lgan taqdirdagina amalga oshishi mumkin.
