Londonning «Arsenal» klubi bosh murabbiyi Mikel Arteta Chempionlar ligasi yarim finali doirasida bo‘lib o‘tgan «PSJ» va «Bavariya» (5:4) o‘rtasidagi uchrashuv haqida o‘z fikrlarini o‘rtoqlashdi.

Seshanba kuni Parijda o‘tgan ushbu bahsdan bir kun o‘tib, «to‘pchilar» Madridda «Atletiko» bilan durang (1:1) o‘ynagan edi.

«Ehtimol, Parijdagi o‘sha o‘yin — men hayotimda ko‘rgan eng yaxshi bahs bo‘ldi. Har ikki jamoaning sifati, ayniqsa, futbolchilarning individual mahorati — bu shunchaki o‘zgacha daraja. Bungacha hech qachon bunga o‘xshashini ko‘rmaganman.

Biroq, agar ushbu futbolchilarning maydonda o‘tkazgan daqiqalariga e’tibor qaratsangiz, ularning nima uchun bunchalik tetik ekanligini tushunasiz. Bunday yuqori klassni namoyish etish uchun inson tetik bo‘lishi kerak. Bizning ichki chempionatlarimizdagi raqobat darajasi o‘rtasidagi farq — yer bilan osmoncha. Bu ikki xil dunyo. Kontekstni hisobga olmasdan, bir jamoani boshqasi bilan solishtirib bo‘lmaydi», — dedi Arteta matbuot anjumanida.

«Bavariya» va «PSJ» o‘rtasidagi javob uchrashuvi 6 may kuni bo‘lib o‘tadi. Undan bir kun oldin esa «Arsenal» o‘z maydonida «Atletiko»ni qabul qiladi.