Лондоннинг «Арсенал» клуби бош мураббийи Микель Артета Чемпионлар лигаси ярим финали доирасида бўлиб ўтган «ПСЖ» ва «Бавария» (5:4) ўртасидаги учрашув ҳақида ўз фикрларини ўртоқлашди.

Сешанба куни Парижда ўтган ушбу баҳсдан бир кун ўтиб, «тўпчилар» Мадридда «Атлетико» билан дуранг (1:1) ўйнаган эди.

«Эҳтимол, Париждаги ўша ўйин — мен ҳаётимда кўрган энг яхши баҳс бўлди. Ҳар икки жамоанинг сифати, айниқса, футболчиларнинг индивидуал маҳорати — бу шунчаки ўзгача даража. Бунгача ҳеч қачон бунга ўхшашини кўрмаганман.

Бироқ, агар ушбу футболчиларнинг майдонда ўтказган дақиқаларига эътибор қаратсангиз, уларнинг нима учун бунчалик тетик эканлигини тушунасиз. Бундай юқори классни намойиш этиш учун инсон тетик бўлиши керак. Бизнинг ички чемпионатларимиздаги рақобат даражаси ўртасидаги фарқ — ер билан осмонча. Бу икки хил дунё. Контекстни ҳисобга олмасдан, бир жамоани бошқаси билан солиштириб бўлмайди», — деди Артета матбуот анжуманида.

«Бавария» ва «ПСЖ» ўртасидаги жавоб учрашуви 6 май куни бўлиб ўтади. Ундан бир кун олдин эса «Арсенал» ўз майдонида «Атлетико»ни қабул қилади.