Markaziy himoyachi Emerik Laport «Manchester Siti»ni «An-Nasr» klubiga almashtirgan davrlarini yodga oldi. Ispaniyalik futbolchi «shaharliklar» safida besh yil davomida to‘p tepgan va 2023 yilda Saudiya Arabistoniga yo‘l olgan edi.

«Men ketganimdan afsuslandim, chunki dunyoning eng yaxshi klubida edim. U yerda futbolchilar haqida qayg‘urishlari — shunchaki noyob hodisa. Vaqt o‘tishi bilan bunga o‘rganib qolarkansan, oddiy holdek qabul qilarkansan, lekin ketganingdan keyin bu qanchalik ajoyib bo‘lganini anglab yetasan.

«Manchester Siti»dan chin dildan minnatdorman. Bu klub haqida bironta ham yomon gap ayta olmayman. Men uchun bu unutilmas tajriba va hayotimdagi eng yaxshi damlardan biri bo‘lib qoladi», — deya Laportning so‘zlarini keltirmoqda Al Nassr Zone.

Eslatib o‘tamiz, o‘tgan yili futbolchi o‘z faoliyatini boshlagan jamoasi «Atletik» Bilbaoga qaytib kelgan edi.