Chap qanot himoyachisi Maylz Lyuis-Skelli va hujumkor yarim himoyachi Itan Nvaneri Londonning «Arsenal» klubini tark etishi mumkin. «To‘pchilar» rahbariyati har ikki yosh yulduz bo‘yicha takliflarni ko‘rib chiqishga tayyor, deb xabar bermoqda The Sun.
Klub tarbiyalanuvchilarining sotilishi moliyaviy hisobotlarda sof foyda sifatida qayd etiladi, shu sababli bu klub uchun juda foydali hisoblanadi. London grandi transfer byudjetini ko‘paytirish maqsadida ushbu imkoniyatdan foydalanishi mumkin.
Transfermarkt ekspertlarining bahosiga ko‘ra, Lyuis-Skellining narxi 35 million, Nvaneriniki esa 40 million yevroni tashkil etadi. Har ikki futbolchi hozirda 19 yoshda.
Eslatib o‘tamiz, Nvaneri joriy mavsumning ikkinchi yarmini Fransiyaning «Marsel» klubida ijara asosida o‘tkazmoqda.
