«Bavariya» yarim himoyachisi Leon Goreska Myunxen jamoasidagi eng yodda qolgan davri haqida gapirib berdi. Ma’lumot uchun, futbolchi yozda bavariyaliklar safini tark etadi.
«COVID-19 tufayli yuzaga kelgan tanaffusdan keyingi davrda, biz jamoa bo‘lib birin-ketin rekordlarni yangiladik, Chempionlar ligasida g‘alaba qozondik va "trebl" qayd etdik. Afsuski, bularning aksariyati bo‘sh tribunalar ostida sodir bo‘ldi. Bu haqiqatan ham achinarli edi. O‘shandan beri xuddi shunday mavsumni yana bir bor, lekin endi muxlislar bilan birgalikda boshdan kechirish men uchun katta motivasiyaga aylandi. Shu sababli ham qishda mavsum yakunigacha qolishga qaror qilgandim. Men 2020 yilgi muvaffaqiyatni (ECHLdagi g‘alaba nazarda tutilmoqda — tahr.) aynan muxlislarimiz bilan birga takrorlashni juda istayman. Bu o‘zgacha voqea bo‘lgan bo‘lardi», — deya Goreskaning so‘zlarini keltirmoqda Myunxen klubi rasmiy sayti.
