«Napoli»ning «Komo» bilan o‘yinda ochko yo‘qotishi Milanning «Inter» klubi vazifasini osonlashtirdi — endilikda ularga rasman Italiya chempioni bo‘lish uchun bor-yo‘g‘i bir ochko kifoya qiladi. Ayni damda neapolliklar mavsum yakuniga qadar uchta o‘yinga ega va peshqadamdan to‘qqiz ochko ortda qolmoqda. Ular hali ham «Inter»ga yetib olishlari mumkin, ammo buning uchun milanliklar qolgan to‘rtta uchrashuvning barchasida mag‘lub bo‘lishlari va birorta ham ochko ishlamasliklari talab etiladi.
Nazariy jihatdan «Milan» ham «Inter»ni quvib yetishi mumkin — mavsum tugashiga to‘rt tur qolganda farq 12 ochkoni tashkil etmoqda. Biroq bu ham faqat Kristian Kivu shogirdlari qolgan barcha o‘yinlarni boy berishni «qasd qilgan» taqdirdagina amalga oshishi mumkin bo‘lgan ssenariydir.
