«Наполи»нинг «Комо» билан ўйинда очко йўқотиши Миланнинг «Интер» клуби вазифасини осонлаштирди — эндиликда уларга расман Италия чемпиони бўлиш учун бор-йўғи бир очко кифоя қилади. Айни дамда неаполликлар мавсум якунига қадар учта ўйинга эга ва пешқадамдан тўққиз очко ортда қолмоқда. Улар ҳали ҳам «Интер»га етиб олишлари мумкин, аммо бунинг учун миланликлар қолган тўртта учрашувнинг барчасида мағлуб бўлишлари ва бирорта ҳам очко ишламасликлари талаб этилади.
Назарий жиҳатдан «Милан» ҳам «Интер»ни қувиб етиши мумкин — мавсум тугашига тўрт тур қолганда фарқ 12 очкони ташкил этмоқда. Бироқ бу ҳам фақат Кристиан Киву шогирдлари қолган барча ўйинларни бой беришни «қасд қилган» тақдирдагина амалга ошиши мумкин бўлган сценарийдир.
