«Fiorentina» darvozaboni David de Xea mavsum yakunlanganidan keyin jamoasini o‘zgartirishi mumkin. Ispaniyalik posbonning shartnomasi 2028 yilgacha mo‘ljallangan bo‘lsa-da, uning kelajagi noma’lumligicha qolmoqda.

Insayder Nikolo Skiraning ma’lumotiga ko‘ra, yaqin kunlarda «binafsharanglilar» vakillari va darvozabonning agentlari o‘rtasida uchrashuv bo‘lib o‘tadi — tomonlar keyingi hamkorlik bo‘yicha bir qarorga kelishadi. «Manchester Yunayted»ning sobiq yulduzini o‘z safiga qo‘shib olishga Italiyaning boshqa klublari va xorij jamoalari qiziqish bildirmoqda.

David de Xea 2024 yilning yozidan buyon «Fiorentina» sharafini himoya qilib kelmoqda. Joriy mavsumda 35 yoshli posbon 43 ta o‘yinda maydonga tushib, o‘z darvozasidan jami 55 ta gol o‘tkazib yubordi. Transfermarkt portali futbolchining transfer narxini 3,5 million yevroga baholagan.