Eddi Xau joriy mavsum yakunlanganidan keyin ham «Nyukasl Yunayted» bosh murabbiyi lavozimida qoladi.

The Athletic nashrining xabar berishicha, agar kutilmagan vaziyatlar yuzaga kelmasa, ingliz mutaxassisi 2026/27 yilgi mavsumda ham jamoani boshqaradi. 48 yoshli mutaxassis «Sent-Jeyms Park»da qolishni istaydi va klub egalari hamda rahbariyatining qo‘llab-quvvatloviga ega.

Xauni qoldirish haqidagi qaror shu haftada bo‘lib o‘tgan muzokaralardan so‘ng qabul qilindi. Unda «Nyukasl»ning asosiy egasi hisoblangan Saudiya Arabistoni Davlat investisiya jamg‘armasining (PIF) 25 kishilik delegasiyasi ishtirok etdi.

Barcha tomonlar ushbu mavsum yetarlicha yaxshi bo‘lmaganini va buni takrorlash mumkin emasligini tan olishdi. Shunga qaramay, muzokaralar muvaffaqiyatli o‘tgani va bosh murabbiyning kelajagi borasida bir to‘xtamga kelingani ta’kidlanmoqda.

Garchi bu mavsumda natijalar pasaygan bo‘lsa-da, «Nyukasl» egalari jamoaning avvalroq Chempionlar Ligasiga chiqqanini va Xau qo‘l ostida qo‘lga kiritilgan Angliya Liga Kubogini inobatga olishdi.

Hozirda «Nyukasl» APLda 35 ta o‘yindan so‘ng 45 ochko jamg‘argan holda 13-o‘rinni egallab turibdi.