Эдди Хау жорий мавсум якунланганидан кейин ҳам «Ньюкасл Юнайтед» бош мураббийи лавозимида қолади.

The Athletic нашрининг хабар беришича, агар кутилмаган вазиятлар юзага келмаса, инглиз мутахассиси 2026/27 йилги мавсумда ҳам жамоани бошқаради. 48 ёшли мутахассис «Сент-Жеймс Парк»да қолишни истайди ва клуб эгалари ҳамда раҳбариятининг қўллаб-қувватловига эга.

Хауни қолдириш ҳақидаги қарор шу ҳафтада бўлиб ўтган музокаралардан сўнг қабул қилинди. Унда «Ньюкасл»нинг асосий эгаси ҳисобланган Саудия Арабистони Давлат инвестиция жамғармасининг (PIF) 25 кишилик делегацияси иштирок этди.

Барча томонлар ушбу мавсум етарлича яхши бўлмаганини ва буни такрорлаш мумкин эмаслигини тан олишди. Шунга қарамай, музокаралар муваффақиятли ўтгани ва бош мураббийнинг келажаги борасида бир тўхтамга келингани таъкидланмоқда.

Гарчи бу мавсумда натижалар пасайган бўлса-да, «Ньюкасл» эгалари жамоанинг аввалроқ Чемпионлар Лигасига чиққанини ва Хау қўл остида қўлга киритилган Англия Лига Кубогини инобатга олишди.

Ҳозирда «Ньюкасл» АПЛда 35 та ўйиндан сўнг 45 очко жамғарган ҳолда 13-ўринни эгаллаб турибди.