«Barselona» vingeri Rafinya Dias jarohatidan so‘ng maydonga qaytishga tayyor. 29 yoshli futbolchi sonidan olgan jarohatini davolab bo‘ldi va mart oyidan beri ilk bor «Osasuna»ga qarshi kechgan so‘nggi o‘yinda «ko‘k-anorranglilar» qaydnomasiga kiritildi, biroq zaxira o‘rindig‘ida qoldi.

Mundo Deportivo nashrining xabariga ko‘ra, agar biror kutilmagan holat yuz bermasa, braziliyalik futbolchi bo‘lajak «El-Klasiko»da zaxiradan maydonga tushadi. «Real» bilan uchrashuv kelasi yakshanba, 10 may kuni bo‘lib o‘tadi. Agar Xans-Diter Flik shogirdlari «Kamp Nou»da «qaymoqranglilar»ga imkoniyatni boy berishmasa, muddatidan oldin La Liga chempionligini qo‘lga kiritishadi.

Ma’lumot uchun, Rafinya joriy mavsumda «Barsa» safida 31 ta uchrashuvda maydonga tushib, 19 ta gol va 8 ta golli uzatmani o‘z hisobiga yozdirib qo‘ygan.