Milanning «Inter» klubi sport direktori Pyero Auzilio jamoa bosh murabbiyi Kristian Kivuning muvaffaqiyat siri haqida gapirib berdi. Ruminiyalik mutaxassis tayinlanganidan keyingi ilk mavsumidayoq jamoani A Seriya chempionligiga yetaklab keldi. «Neradzurrilar» yakshanba kuni «Parma»ni mag‘lub etib (2:0), skudettoni naqd qildi.

«Ko‘pchilik professional darajada bor-yo‘g‘i 13 ta o‘yin o‘tkazgan murabbiy «Inter»ni yangi g‘alabalarga boshlay olmaydi deb o‘ylagan edi. Biroq Kivu oqilona ish tutdi, u odamlarni boshqarishda ajoyib qobiliyatga ega. U ishga zamonaviy va aqlli yondashuvni qo‘lladi. Klublar o‘rtasidagi jahon chempionati Kristianga vaziyatni tezroq tushunib, jamoaga moslashib ketishiga yordam berdi», — dedi Auzilio zafardan so‘ng Sky Sport nashriga bergan intervyusida.

Eslatib o‘tamiz, Kivuning o‘rnida avval Simone Indzagi ishlagan va u Chempionlar ligasi finalida «PSJ»dan qabul qilingan mag‘lubiyatdan so‘ng lavozimini tark etgan edi.