Миланнинг «Интер» клуби спорт директори Пьеро Аузилио жамоа бош мураббийи Кристиан Кивунинг муваффақият сири ҳақида гапириб берди. Руминиялик мутахассис тайинланганидан кейинги илк мавсумидаёқ жамоани А Серия чемпионлигига етаклаб келди. «Нерадзуррилар» якшанба куни «Парма»ни мағлуб этиб (2:0), скудеттони нақд қилди.

«Кўпчилик профессионал даражада бор-йўғи 13 та ўйин ўтказган мураббий «Интер»ни янги ғалабаларга бошлай олмайди деб ўйлаган эди. Бироқ Киву оқилона иш тутди, у одамларни бошқаришда ажойиб қобилиятга эга. У ишга замонавий ва ақлли ёндашувни қўллади. Клублар ўртасидаги жаҳон чемпионати Кристианга вазиятни тезроқ тушуниб, жамоага мослашиб кетишига ёрдам берди», — деди Аузилио зафардан сўнг Sky Sport нашрига берган интервьюсида.

Эслатиб ўтамиз, Кивунинг ўрнида аввал Симоне Индзаги ишлаган ва у Чемпионлар лигаси финалида «ПСЖ»дан қабул қилинган мағлубиятдан сўнг лавозимини тарк этган эди.