Gari Nevillning fikricha, joriy mavsumda «Liverpul» jamoasini seleksiya ishlari pand berdi. 35-turdan so‘ng «qizillar» APL turnir jadvalida 4-o‘rinni egallab turibdi.

«Mavsum boshida biz ularni birinchi yoki ikkinchi o‘ringa qo‘ygandik. Ular Frimpong Trentning o‘rnini egallashini, Kerkez esa Robertsonning o‘rnini bosishini istashgandi. Salohdan o‘tgan yilgi natijalarini bu yil ham takrorlashini kutishgandi. Ular Ekitike va Isak ikkalasi birgalikda 60 ta gol uradi, Virts esa chap qanotdan markazga ko‘chib, furor ko‘taradi deb o‘ylashgandi.

Biroq bu rejalar amalga oshmadi. Seleksiya muvaffaqiyatsiz chiqdi, buning ustiga jarohatlar ham qo‘shildi. Ular o‘tgan mavsumdan beri yoshi katta futbolchilarning o‘rnini to‘ldirishga harakat qilishmoqda, ammo jamoaga kelib qo‘shilganlar, Ekitikedan tashqari, o‘yinga kirishib keta olishmadi», — dedi Angliya terma jamoasining sobiq himoyachisi.